Habari
Tozo za mafuta zinavyoboresha barabara za Tanzania: RFB yatoa elimu kwa wananchi
Wananchi waliotembelea banda la Bodi ya Mfuko wa Barabara (RFB) katika Maadhimisho ya Wiki ya Utumishi wa Umma yanayoendelea katika Viwanja vya Chinangali Park jijini Dodoma wamepata fursa ya kufahamu kwa undani chanzo kikuu cha fedha zinazowezesha matengenezo ya barabara nchini.
Akitoa elimu kwa wananchi hao, Kaimu Mtendaji Mkuu wa Mfuko wa Barabara (RFB), Mhandisi Rashid Kalimbaga, amesema kuwa tozo zinazotozwa kwenye mafuta ya petroli na dizeli ndizo nguzo kuu ya upatikanaji wa fedha za matengenezo ya barabara nchini. Amesema mfumo huo umewekwa mahsusi kuhakikisha barabara zinaendelea kuwa salama, zenye ubora na zinazopitika kwa urahisi katika misimu yote ya mwaka.
Mhandisi Kalimbaga ameeleza kuwa mbali na mapato yatokanayo na tozo za mafuta, Mfuko wa Barabara pia hupata fedha kupitia tozo zinazolipwa na magari ya kigeni yanayotumia mtandao wa barabara nchini. Mapato hayo yote hukusanywa na kuelekezwa moja kwa moja katika kugharamia shughuli za matengenezo ya barabara za kitaifa na za halmashauri zinazohudumiwa na TANROADS na TARURA.
Amesisitiza kuwa uwekezaji katika matengenezo ya barabara una mchango mkubwa katika kukuza uchumi wa taifa kwa kurahisisha usafirishaji wa watu na bidhaa, kuunganisha maeneo ya uzalishaji na masoko, pamoja na kuboresha upatikanaji wa huduma muhimu za kijamii.
Kwa mujibu wa Mhandisi Kalimbaga, kwa sasa Mfuko wa Barabara unafadhili matengenezo ya mtandao wa barabara wenye urefu wa zaidi ya kilomita 181,000 nchini. Mtandao huo unaendelea kuwa mhimili muhimu wa maendeleo kwa kuwezesha shughuli za kiuchumi na kijamii katika maeneo mbalimbali ya Tanzania.
Ameongeza kuwa kila mchango unaotokana na tozo za mafuta una nafasi muhimu katika kuhakikisha barabara zinaendelea kuwa salama, zenye ubora na zinazoweza kuhudumia mahitaji ya wananchi na uchumi wa taifa kwa ufanisi.
Aidha, Mhandisi Kalimbaga amewahimiza wananchi kuendelea kutembelea banda la RFB katika Maadhimisho ya Wiki ya Utumishi wa Umma ili kupata elimu zaidi kuhusu majukumu ya Mfuko wa Barabara, vyanzo vyake vya mapato na namna fedha hizo zinavyotumika kuboresha miundombinu ya barabara kwa manufaa ya Watanzania wote.
Maadhimisho ya Wiki ya Utumishi wa Umma 2026 yanaongozwa na kaulimbiu isemayo “Kuchochea Uwajibikaji Jumuishi kwa Huduma Endelevu,” ikiwa ni sehemu ya kuimarisha utoaji wa huduma bora kwa wananchi kupitia uwajibikaji na ushirikishwaji wa wadau mbalimbali katika maendeleo ya taifa.
